T’aggio cuntato,

comme ‘na vota, t’aviva cumpurtà,

si vulive ‘na guagliona cunquistà.

Mo, è tutto n’ata cosa

tutt’ è cagnato!

Nun ce so’ cchiù appustamiente

e ‘o scuorno pe’  ’a gente.

Tu… mo, nun hê fa’ cchiù niente.

Mo, è  ‘a femmena ca cu tte se spassa,

po’, quanno s’è stancata,

piglia e te lassa…

se ne va cu n’ato…

e a tte, t’ha ggià scurdato.

Cu n’ato subbeto se mette

pecchè l’ammore, oggi, è usa e getta.

L’ammore è facile cunzumo

s’appiccia ‘o cerviello

e tutto va in fumo.

E…  ‘e chill’ammore fernuto rummane sulo ‘a cennere

e ‘o ricordo appannato ‘e ‘na nuttata. 

Mo, nisciuno se vo’ spusà,

tutte, stanno troppo buono

cu mammà e papà.

Pure ca nce so’ chiacchiere in quantità…  ma che fa’!

…ogne ghiuorne ,‘a pulizia, è assicurata,

‘o piatto ncopp’ ‘a tavola appriparato,

‘o spasso nun manca e stanno, tutte beate e spenzierate. 

Si pure quaccuno s’è spusato,

ncapo a poco tiempo o è siparato…

o è divorziato.

‘A famiglia s’è allargata,

‘e figlie so’ abbandunate…

Nun sanno cchiù, povere criature,

addò hanna sta’,

si cu mammà o cu papà…

forse, ‘nu poco ccà, forse, ‘nu poco llà!

Mo, nun saccio cchiù che v’aggia dì

ma ‘o munno… nun po’ ghì accussì.

Mme scuse cu tutt’ ‘a ggente…

perdunateme… ma, io, 

io, nun ce capisco,

nun ce capisco propio niente!